Romans 16
PoloꞋa mukiꞋa veaꞋmogamina “Felugae.” huno hu falu humatene.
1FipiꞋa tusiꞋa kanaleꞋya huno Yisasina aguꞋa aminea tasatimoꞋe, Senikalia maineꞋya Yisasina amakuꞋa aminaya veaꞋmogamina kanaleꞋya huno amaya humaine. 2AnumayatimoꞋene ailokaetama mainayafe Fipina avaletama amuꞋnotamifi atesageno maisie. Anumaya Koti nafaꞋnemogatama naꞋa hisunana kanale yane. Nagi nagoꞋa yamoꞋma kanama haisigetama kanaleꞋya hutama aya hiho. FipiꞋa aniꞋa huno hagotenoꞋa nagayaene kasagoꞋya veaꞋnene taya humaineane.3Yisasi Kalaisi aliꞋyama nahaꞋmaeꞋana neꞋaliꞋa alavelafena Palisilagani Akuvilaganina hutama falu fala hunateho. 4“KagaiꞋma kahaesagetaꞋa faligahune.” huꞋana humainaꞋafe nagayake musena hunoꞋanatogi mukiꞋa Yuta vaya omainaya Yisasi anagaꞋmoꞋyaene huꞋya musena huneꞋanatae.
5Anakai nopima Yisasi kema havigahe melitaluma nehaya veaꞋnene nagaila hu falu fala keꞋnia humateho. Epainetasina, Esia kotega mainaya veaꞋmogamina hagoteno amakaseno Kalaisi kea havino agupi malenea kanoa maineanagino nahau nayamopafi nenagea nenafuna nagaila hu falu fala keꞋnia huteho. 6AniꞋa hutama MaliaꞋa, tamakaiꞋenema mainenoꞋa tamaya hugahena tusi aliꞋya ali-mainea alagi hutama falu fala huteho. 7Atalonikusigani Yuniasiganina aniꞋa hutama nagaila hu falu fala keꞋnia hunateho. Nagaya Yisasi kema ohavinoa kanafina ani kanolatana Yisasife haviꞋana anakupi maleteꞋana Aposolo vayaꞋmogami amuꞋnoꞋamifi anaki hanea kanolata maineꞋana nagaiꞋene Yuta nofi vaya mainonanagita nagaiꞋene Yisasi kema humainona yateti nofila hulatenayane.
8Ampiliatusina AnumayamoꞋene ailokaeyaꞋageꞋna naguꞋa aminoa nenafuꞋagi nagaila hu falu fala keꞋnia huteho. 9Tamakaya UpanusiꞋa Anumayamo aliꞋyana tokaetaꞋa neꞋaluꞋa kanoene Setakisina kanaleꞋya huꞋna naguꞋa aminoa nenafuꞋene nagaila hutama falu fala keꞋnia huneꞋanatetama hiho. 10ApelesiꞋa Kalaisina akaveꞋma nemaliafe agia hanegi nagaila hu falu fala keꞋnia huteho. Alisitopulusi afamoꞋmogamina nagaila hu falu fala keꞋnia humateho. 11HelotioniꞋa nagai nofi vayalagi nagaila hu falu fala keꞋnia huteho. AnumayamoꞋene ailokaeꞋya mainaya tafu-taganagamina Nasisusi afamoꞋmogamina nagaila hu falu fala keꞋnia humateho.
12Talifinagani Talifosagania Anumayatimo aliꞋya tusiya huꞋana neꞋaliꞋa kanolatanagi nagaila hu falu fala keꞋnia hunateho. PesisiꞋa nahau nayamopafi nenagea alagi Anumayatimo aliꞋyana ali-maineafe nagaila hu falu fala keꞋnia huteho. 13LufusiꞋa kanaleꞋya huno Yisasina akave nemalea kanoene itaꞋamoꞋenena nagaila hu falu fala keꞋnia hunateho. Lufusina itaꞋamoꞋa itaꞋnimo kana huno nahaꞋnemaeyane. 14AsinakalitusiꞋma FalegoniꞋma HemisiꞋma PatolopasiꞋma HemasiꞋma amakaiꞋenema tokaeꞋya mainaya nafuꞋnaganagamina nagaila hu falu fala keꞋnia humateho. 15FilologusiꞋene YuliaꞋene NeleusiꞋene asaꞋamoꞋa OlipasiꞋene amakaiꞋene mainaya Yisasi anagaꞋene nagaila hu falu fala keꞋnia humateho.
16Anumaya Koti anagaꞋmogatama nehuna kava hutama tamahaote tamahaote mukiꞋa tafu-taganagamina tamayana amamitama ali falu fala humateho. MukiꞋa kumate maineꞋya Yisasi anagaꞋmoꞋya “Mainafio?” huꞋya hu falu fala hulamatae.
NagoꞋa vayaꞋmoꞋya Yisasi anagaꞋmogami amuꞋnopiti aliꞋya aye fako humainae.
17MukiꞋa nafuꞋnaganagatama tamakesa alisua kea haviho. NagoꞋa vayaꞋmoꞋya emaineꞋya tamahapai-mainoa kemona amakaveꞋno huteꞋya neꞋatagaeꞋya tamakaya mono kema havigahe alitaluma nehaya yapi melifako hisaya kema nehaya vayaꞋmogamifena kaꞋyetama mainetama ani kema nehaya vayaꞋmogamina tamakaveꞋno humateho. 18Ani vayaꞋmoꞋya Anumaya Kalaisi aliꞋyafena amakesa ohaviꞋya amakaiꞋami age hamaꞋye hisaya yafekeꞋya akave malesaya amakesa nehae. Hagalama-haisifa ke huꞋya masave amake neꞋaiꞋya amaipafi ayegesageꞋya kanale amakesama nohaviya veaꞋnea ayemavataga huꞋya alihaviya humategahae. 19Tamakaya YisasiꞋma hulatenea yafena havitama tamakupi maletama atafa hulinaya kea mukiꞋa veaꞋmoꞋya ago havimainaya yafena haviteꞋna tusiꞋa muse nehue. Kanale auꞋava yamo aepaꞋa havilama hutama nagoꞋa kefo yamofe tamakesa ohavisae huꞋnahe nehue. 20Anumaya KotiꞋa, taipa falu hisia yamona aepaꞋagino, aupa kanafi Satanina taiyafinaga ayeno tatapegahie. YisasiꞋa Anumayatimona kayone yamaꞋamoꞋa tamakayaene hanesie huꞋna nehue.NagoꞋa veaꞋmoꞋya avo kaeꞋya “Felugae.” huꞋya Lomu veafe hu falu fala huneꞋamatae.
21NagaiꞋene aliꞋya neꞋalia kanoa, TimotiꞋa, huno falu fala hulamate. AniꞋa huꞋya LusiusiꞋma YesoniꞋma SosipataꞋma nagaiꞋni Isaleli nofi nafuꞋnagaꞋya “Mainafio?” huꞋya hu falu fala hulamatae.22Nagaya TetiusiꞋna Polo avayafiti ke aliꞋna mani avona kaeꞋna Anumayamo agile “Felugae.” huꞋna hu falu fala hunelamatoe.
23KaiyusiꞋa “Felugae.” huno hu falu fala hunelamate. NomaꞋafina kanaleꞋya huno yagainategeꞋna mainogeꞋya Yisasi anagaꞋmoꞋya Anumayamo kema havisaya yafena agai nopina melitalu humainae. ElasatusiꞋa ani kumaꞋalate Kamanimo kusi kusi kanoene KavotusiꞋa tafu-taganaꞋene “Felugae.” huꞋana hu falu fala hunelamataꞋe.
Tagaya Anumaya Koti agi alisaga hisune.
25Anumaya Koti agia tusiya huta alisaga higetao. YisasiꞋma hulatenea kanale mono kema hu-haleꞋna nelamamua keleti Anumaya KotiꞋa hetitama tokiya vaitama maisaya tokiya tamamigahie. Mani kea hagoteno ayaꞋaya kanagefa falakino haneanagino menia Anumaya KotiꞋa ago alino falote humalene. Anumaya KotiꞋa maige maige nehia kanomoꞋa mage huno humaine “Mani kea hufalote hiho.” huno humainea ke amaune vayaꞋmoꞋya kae-malenaya kefiti “MukiꞋa alu nofi veaꞋmogamina hamapaisageꞋya haviteꞋya amakupi maleꞋya amametiti huꞋya nagaila nahaisia kava hisae.” huno humaineane.27Anumaya KotiꞋa nagokeꞋmo mukiꞋa kanale havi haviꞋyaꞋami hanea veala amakase-mainea kano maineafe Yisasi KalaisiꞋa hulateneafene huta agola mukiꞋa kanafina agia alisaga hisune. Tamage.
KeꞋnia male haꞋno hie.
NagaiꞋni nagia PoloꞋnae.
Copyright information for
KMU